Nekk d umeddukal inu, neqqar-as Muḥemmed, nemsagar di Venizia Ice n Nnaḍuṛ, wenni i illan s nnej n users n ulaway. Kumandiɣ ijj n ccikula s ukffay. Ttuɣa nessawal x tsertit, x mamek nettwala yimal nneɣ, xef min ɣer ggeɣ lami i ɣer ɛeqbeɣ ɣer Fṛansa, xmi i ɣer nfafaleɣ zi tnurẓemt inu di Arrif. Ttuɣa ur ssineɣ min xseɣ ad ggeɣ xminni i ɣer dewleɣ ɣer Fṛansa. Deg umgar inu, ittssiggʷej-ayi udwal inu x yixf inu. Ur deg-s xaṛṛṣeɣ gaɛ, axmi ila adwal inu ɛemmars ad yili, axmi ila xseɣ ad qqimeɣ da i lebda. Zzat ma ad d-aseɣ ɣer Arrif, sbeddeɣ tawuri u ttuɣa rzuɣ i tenneḍnit, maca sbeddeɣ ula d tarezzut inu, kksiɣ aṛṛuḍ inu, ggiɣ-ten di tsufert mbla ad arreɣ taynit i tudert inu, i yimal inu, i walu. Ṭṭfeɣ abrid inu ɣer Arrif, axmi ttuɣa xseɣ ad jjeɣ awern-ayi imunas i di ttnaɣeɣ di Fṛansa. Ttuɣa ur ssineɣ min d as ɣer iniɣ i Muḥemmed lami d ayi yinna : "Min texsed ad tegged awern-i i udwal nnek ?", uka nniɣ-as walu, aseɣdi wala ixarriqen. Ttuɣa ur xseɣ ad sxareqqeɣ i yixf inu : ula d nekk ur ssineɣ ca. Muḥemmed yuka aked-i nekk weḍḍaṛeɣ deg ubrid n tudert maca ur yinni walu, ur d-iɛawed ca i useqsi nnes. Afilu n tudert inu imxumbel, ur ssineɣ mamek i ɣer t-nufsuluɣ, mani i d ayi ɣer yawi, uka rewleɣ zi Fṛansa ɣerma ur ttbuhluyeɣ ca.

Netta aqqa-t deg uɣezdis afusi n leqhwa, aked ijjen uwessar, imɣer x-as. Iswa ijj n lkas n watay. Yiṛeḍ ijj n utriku altcini s teḍuft. Aɣembub nnes d acemlal, acuwwaf d aberkan, tiṭṭawin izdigen d timeẓẓyanin, infufen d izwawaɣen d imeẓẓyanen, inzar d azdad. Aẓli ya ur nzemmer ad x-as nessiwel, ad x-as nini awal, aẓli ya issesɣed maṛṛa tiwalin i neɛlem, waxxa ad d-tsuffɣed tawalt tamaynut, tawalt-a ur tefki ɣerma ad nesnummel aẓli ya. Zegga i t-ẓṛiɣ ur iffiɣ zeg uzellif inu.

Ttwaliɣ ixezzar deg-i. Ula d nekk muqqleɣ deg-s. Ṣekkʷḍeɣ deg-s. Ttuɣa rzuɣ tiṭṭawin inu ad msaggaren tinni nnes. Nessedḥa, neḥccem, maca ssneɣ d netta issen nekk ssneɣ ixezzar deg-i, nekk ssneɣ d netta issen nekk muqqleɣ deg-s. Nesniɛmel waha ur nettwili ca min ittemsaren ger-aneɣ-d.

Muḥemmed iqqim issawal, issawal. Ur arriɣ bu taynit i min iqqar. Ur ittiki ca i min ittemsaren ger-ayi-d d akid-s. "Netta" d isem i ggiɣ i wenni i ttuɣa d ayi imuqqulen. Ur ɣer-s bu isem, ɛad ur t-ssineɣ. Ma ɛejbeɣ-as niɣ uhu ? Mamek i ɣer ggeɣ ɣerma ad issen ila itteɛjib-ayi ? Mamek i ɣer ggeɣ ɣerma ad as iniɣ ɣir ijj n wawal waha ? Mamek i ɣer ggeɣ ɣerma ad ɣelbeɣ tiggʷedi i deg-i izeddɣen ? Tbhuluyeɣ ? Ɛemmars ggiɣ manaya di Paris, tamdint n tmexsa, uka nekk xseɣ ad gabareɣ di Arrif. Ur zemmreɣ ad ɣer-s ruḥeɣ, ataɣ aqqa-t aked baba-s, niɣ dadda-s, niɣ xal-s, wi i issnen. Ur xseɣ ca ad as ḥecmeɣ zzat i uwnis nnes.

Netta ibedd, uka iraḥ ɣer uxxam n waman. Ur izuggert ca, ur iqquṭṭeḍ ca. Abeddi nni irni-y-as aẓli deg wallen inu. Nniɣ i yixf inu : "Ma ad t-ḍfṛeɣ ar dinni ?". Ixaṛṛiṣen ttberkikkiḍen deg uzellif inu maca, ttemxerwaḍen, ula d ijjen ma ttuɣa-t d asebḥan ɣerma ad ayi-y-issiweḍ ɣer wexxam n waman. Netta idwel-d, nekk ɛad qqimeɣ deg umkan inu. Ur zeɛmiɣ.

Muḥemmed iqneḍ minzi ur wennseɣ ca ameddukal inu s tidett. Nffeɣ zi Venizia Ice. Deg ubrid n ufuɣ, xzareɣ ɣer Netta i umur ameggaru. Di tzahzit nni, iwwey-ayi-dd aṛebbi ɛemmars ad t-ẓreɣ ɛawed. Ur ssineɣ bu isem nnes, ur ssineɣ walu x-as, ur akid-s ssiwleɣ gaɛ, ur d ay ijji ca tiwggaḍt nnes, limart nnes. Muḥemmed ssiwḍeɣ-t ɣer temdint n Selwan s ṭṭunubin. Nekk raḥeɣ ar Uɛarwi mani kerriɣ ijj n taddart ɣerma ad sseɛduɣ tanurẓmt inu di Arrif. Deg ubrid, zi Nnaḍuṛ ar Aɛarwi, Netta izdeɣ deg umgar inu. Igga arrimet inu d tageldit nnes, mani igelled weḥḥed-s. Ttuɣa xseɣ ad t-ssuffeɣ zeg guggu inu maca ur zemmreɣ. Mayemmi i ɣer ɣewwɣeɣ mgal i taycitin nni ? Aɣewwaɣ ittɣewwaɣ mgal ugellid i igelden x yijj n ugdud ikmel weḥḥed-s. Ur ittɣewwaɣ ca mgal wenni niɣ tenni i ixsen ad inbeḍ x yijj n wul waha. Jjiɣ-t ad idder di guggu inu. Udfeɣ di taddart inu. Dewwceɣ, ẓulleɣ, qqimeɣ cwayt ad furrjeɣ tilifun inu, uka ẓṛiɣ ijj n lɛraḍ di Instagram. Seqsiɣ i yixf inu "Min iɛna wa?". Qbleɣ lɛraḍ. Ur umineɣ di min ttuɣa ttwaliɣ lami ẓṛiɣ leḥsab nni. D Netta, ihi d netta. D wenni i ttuɣa illan anllina di leqhwa.

Kkin xafi aṭṭaṣ n yiseqsiten. Mamek igga ɣerma ad ayi yaf di Instagram? Imuqqel deg-i minzi issen-ayi ? Ma ɣekkʷiɣ ixf inu ? Ma d meẓṛi i din ger-aneɣ ? D nekk waha i iẓṛin manaya ger-ayi-d d netta. Muqqleɣ di twalfin i ifser di leḥsab nnes. Ttuɣa itteɛjib-ayi tawlaft mani illa zzat i lburj n Galata di Stambul. Umur-a, ttuɣa yiṛeḍ ijj n utriku d azeggʷaɣ, d userwal d acemlal. Ad iniɣ, ɛawed ad iniɣ, mani mma ad tekkid deg umaḍal nni, ɛemmars i ma tufid ijj n uẓli ikna ameknaw Netta. Sekkeɣ-as ijj n tebrat i di uriɣ : ”Ma d cekk i ttuɣa ẓṛiɣ anllinna di Venizia Ice ?”

Yarra-yi-d tabrat : Ihi, d nekk i ttuɣa illan di lqehwa.

Uka, nniɣ-as : Ma tessned ayi ?

Inna-yi : Uhu, maca ad nemlussun.

Jawbeɣ-as : I mamek teggid tufid-ayi da ?

Inna-yi : Di leqwah, ttuɣa tiṛḍed ijj n ssenslet s uzamul amaziɣ, ttuɣ mamek d as neqqar ?

Nekk : Ihi. Neqqar-as, yaz, d ijj n usekkil d amaziɣ.

Netta : Wenni wi ked ttuɣa tellid di Venizia Ice, ssneɣ-t. Di lista nnes n yimeddukal di Instagram, ttuɣa rezzuɣ x tefras i ẓṛiɣ di leqhwa. Ur ufiɣ ca uɣembub i ẓṛiɣ dini. Maca, ufiɣ ijj n tewlaft deg-s ijj n ssenslet d tmaziɣt, ur deg-s bu wudem. Zi senni, fehmeɣ, d wa leḥsab min xef rezzuɣ.

S taḍṣa, nniɣ-as : Teggid ijj n trezzut temɣer ɣerma ad ay tafed. Mayemmi i xef-i teggid tarezzut-a qaɛ ?

Netta : Ggiɣ-tt. Ufiɣ min rzuɣ.

Siɣiɣ amsawal akid-s. Igga ijj n like i bidiyu inu i di ttɣennajeɣ s tmaziɣt. Luxa, issen netta d nekk ur msiɣ ca zi Arrif. Isla i tmaziɣt inu tṛeẓ s yiles inu izleg. D tmaziɣt n yinni i ilulen deg Uruppa. Ggʷdeɣ ad day-i yini as-d ɣer-i ad nemsaggar. Ur nnumeɣ ca ad ssiwleɣ s tmaziɣt aked ca ijjen ur illi zi twacunt inu. Twacunt inu ssnen drus tafṛansist, zemmreɣ ad xelḍeɣ tmaziɣt s tfṛansist, ad ay fehmen. I netta izemmr-as ?

Negga awal ad nemsaggar ɣer tmeddit. Mayemmi ɣddedeɣ ixf inu ? Nmsaggar di Venizia Ice, mani nemẓaṛ umur amezwaru. Netta yiweḍ di leqhwa zzat ad din awḍeɣ. Ttuɣa iqqim di tzeqqa n Venizia Ice, zi manis nzemmer ad nettwala iwdan nnagen deg ulaway. Aqqa ittraja-yi, ikumanda ijj n lkas n lqehwa. Cwayt cwayt, qeddmeɣ ɣer-s, sellmeɣ x-as s uzmummeg. Ḍeṣṣiɣ zeg imezzuɣen. Ul inu ibbireh. Aqqa-y da, akid-s. Nssiwel x umsagar nneɣ, ijj n umsagar issdehcen aneɣ. Wi i ttuɣa izemmeren ad yini ad imser manaya ? Netta ifessi asɣun n umezruy n umsagar nneɣ, s cwayt cwayt, axmi iɛejb-as ad iɛawed, ad yales, ad izehhed taqessist nneɣ.

Argaz nni immal ayi iɣennijen nnes, izemmem-i-ten di tilifun nnes. Tticceɣ tawengint i izlan nnes. Sḥessiɣ-asen. Ma ixes ad ayi immel izemmimen nnes s neɛmmada ? Ul inu irɣa x uẓli d tmijja nnes. Niɣ d wul i yirɣin s tmexsa nnes ? Wassi.

Nekk sḥessiɣ i min d ay iqqar, waha. Yuffu-d nekk ur ssiwileɣ ca. Ssedḥiɣ ad ssiwleɣ s tmaziɣt, ataɣ. Iseqsa-yi x Fṛansa, x yimukan nnes ɣerma ad ay isel tmijja inu i ttuɣa jarrbeɣ ad zeg-s snuffureɣ. Nniɣ-as ɣriɣ di tesdawit n temdint n Lille, uka yinna-yi aṭṭaṣ n yimukan ittwassnen zi Lille, ameknaw La Grande Place, Le Beffroi, La Citadelle, Euralille. Issnebheḍ-ayi s tusna tajɣrafit nnes. Issen imukan ur illin d tmerrit di tineddam tinneḍnit n Fṛansa i ur ssineɣ ca waxxa Fṛansa d tmurt mani nekk luleɣ. Zi senni, issemɣar ugar aṭebheḍ inu deg-s lami d ayi yinna ɛemmars di tudert nnes iraḥ ɣer Fṛansa.

Neffeɣ zi Venizia Ice, nenga di ṭṭunubin inu, neṭṭef abrid i ittawyen ɣer Ayt Nṣar. Deg ubrid, inna-yi zleg x uẓelmaḍ, abrid-a ittawi ɣer teɣremt n ugellid. Abrid irɣa s tfwat, maca fehmeɣ ttuɣa ixes ad naf ijj n umkan mani isulles lḥal. Nedwel ɣer ubrid nneɣ amezwaru, yiwi-ayi ɣer ijjent tagant tudes i ubrid n macina, neqqim din drus. Ur d ayi iɛejib ca araq nni. Ttuɣa xseɣ ad nbeddel amkan, ggʷdeɣ ṭṭunubin inu ad tennuɣ di tagant, deg ukal nnes i iccuren s wuẓṛu d iḥefrawen. Ufiɣ ijj umkan d afejjaj d aḥessi, iggʷej x ṭṭitawin tiɛfanin n yiwdan, ula zeg yinna n uwanek d wakuc. Amkan d afejjaj issezɛem-i-t ad iṭṭef afus inu, ad ayi isqiccem aɣil inu. Immel-ayi timexsa nnes i nnek. Ul inu ttuɣa irdu s umarri, ur umineɣ di min ittemsaren deg wakud nni i sseɛdiɣ.

Nella deg useɣdi maca tifegga nneɣ ssawalent deg wayawya alami isers infufen nnes x tinni yinu. Issenbehḍ-ayi s tebɣest nnes, s taẓyuḍi i zi ukiɣ. Ttuɣa xseɣ ad as ggeɣ tiqemmumin d umezwaru zzat ad ayi-tent yegg. Ttuɣa xseɣ ad rajiɣ ɛad cwayt, ttuɣa ggʷdeɣ ad ṛẓeɣ lqanun. Mayemmi sin n yiwdan ur zemmren ad xsen ayawya ? Mayemmi bab n ujenna i ɣer inha timexsa ger d sin n yiwdan i iqblen ad ddren timexsa nnsen ? Mayemmi ɛad ur nzemmer ad nṛeẓ ṭṭabu x manaya ? Mayemmi ixeṣṣ-aneɣ ad nedder di lefḍiḥet, di teshrarut ? Mayemmi iwdan i ur nessin ca qqaren aneɣ mamek i d aneɣ ixeṣṣ ad nedder d wi ked nzemmer ad nedder, d wi nzemmer ad nxes, d min nzemmer ad nini, d min ur nzemmer ad nini. Maca, ur zemmren ca ad kksen taycitin i illan ger d sin n yiwdan. Ur zemmren ad kksen min illan ger ayi d Netta. S uya, ad nedder waxxa ur d aneɣ qbilen, waxxa deg-neɣ tiggʷdi. Timexsa ad terni tiggʷdi, timexsa d tilelli ur ɣer-neɣ telli ca, timexsa d tilelli i zeg-neɣ yukaren. Taẓyuḍi n ussudem nnes teqqim ɣer-i, maca tamamekt i nessenta timexsa nneɣ s tnuffra tssendef taṛẓugi i ttuɣa ɣer-i.

Nniɣ-as i Netta ma ixess ad ɣer-i d-yas, ɣer taddart inu. Ttuɣa ur issin ma ixess ad yas, ittzehza. Tasgurit nnes, inna-yi ihi. Niweḍ ar din. Nekk ẓulleɣ tiẓallin i ur ggiɣ ca deg wass. Ẓulleɣ, ur ssineɣ mayemmi ttẓalliɣ, ma d yijj tanumi i ɣer-i ? Ma xseɣ ad ayi iwadem akuc ddunub i ggiɣ ? Maca, timexsa ur telli d abekkiḍ, timexsa d inadan. Ma ɛebbdeɣ ijj n wakuc i ikrehen timexsa ? Wassi.

Kemleɣ tiẓallin inu uka nessrusa iɣsan nneɣ x ubayas. Netta issrusa azellif nnes x udmar inu. Nniɣ-as ur d ayi yinni ca isem nnes zeg wami nemsaggar maca ẓṛiɣ di leḥsab nnes igga isem Aladdin. Issfarez-ayi aẓwaṛ n yisem nnes i illan di Instagram maca ur illi d isem nnes s tidett. Inna-yi isem nnes maca ad qqimeɣ ad as iniɣ Aladdin, itteɛjib-ayi isem-a. Netta idwel-d Aladdin, maca ur imsaggar ca aked Yasmina. Ur illiɣ d Yasmina, nekk d nekk. Dliɣ-t s tiqemmumin zzat ad d-idwel ɣer Nnaḍuṛ. Ur izemmer ad iqqim akid-i s yiḍ ikmel. Necca ijj n buqadiyu umi niwid tamdint. Buqadiyu nni ur ikkis ca azuɣmet i ttuɣa ɣer-i. Zzuɣmteɣ ameknaw tanfust n wumẓiw i ur ijjiwnen zi mkul iḥenjaren i yicca. Ur zeg-s jjiwneɣ, ur jjiwneɣ zi tanfust nneɣ i ɛad ittemyari. Ssiwḍeɣ-t ṭṭarf i taddart nnes, uca ɛeqbeɣ ɣer taddart inu.

Yuri-t : Massin Maziɣ.